السعودية وباكستان من شوية أعلنوا عن توقيع اتفاقية دفاع مشترك لأول مرة في تاريخ علاقتهم الطويلة…
محمد اليمني كاتب وباحث سياسي
طب هي أيه تفاصيل الموضوع ده، وليه الاتفاقية دي تعتبر خطوة إيجابية جدًا على طريق التعاون العسكري الإسلامي؟! خليني أشرحلك سريعًا كده…
شوف يا سيدي… 👇
حسب وكالة رويترز والتصريحات الرسمية، ف الاتفاقية اللي اتوقّعت في الرياض بين ولي العهد محمد بن سلمان ورئيس وزراء باكستان شهباز شريف بتنص بوضوح إن أي اعتداء على واحدة من الدولتين يعتبر اعتداء على التانية، يعني التزام متبادل بالدفاع المشترك…
طب يعني أيه؟!
يعني الاتفاقية دي عمليًا بتحط السعودية تحت مظلة الردع النووي الباكستاني، عشان زي ما انت عارف، باكستان قوة نووية معروفة، والكل عارف إن السعودية كانت من أوائل الداعمين لبرنامجها النووي من عقود، وصرفت عليه فلوس كتير جدًا، من أيام العالم النووي الباكستاني عبد القدير خان، اللي يعتبر أبو القنبلة النووية الباكستانية…
وبكده، ف المملكة بقت رسميًا ولأول مرة عندها قوة ردع نووي حقيقية من غير ما تدخل في مفاوضات طويلة أو مشاريع نووية داخلية تسببلها مشاكل سياسية مع أمريكا…
وطبعًا ده عمره ما كان هيحصل لولا الضربة الإسرائيلية للدوحة اللي كسرت الثقة الخليجية في المظلة الأمنية الأمريكية، واللي أكيد أمريكا هتندم عليها ندم عمرها دلوقتي، عشان اتسببت في فقدان ثقة الخليج فيها وحركتهم ناحية الشرق، بعد ما كان تحت طوعها بالكامل…
عايز أقولك ان الاتفاقية دي في ضوء التحركات الإقليمية اللي بتحصل حاليًا، معناها أكبر من مجرد تعاون بين دولتين، وانها دلوقتي أصبحت جزء من حراك إقليمي أكبر…
متنساش ان حصل لقاءات ما بين رئيس الوزراء الباكستاني والرئيس المصري في قمة الدوحة الأخيرة، مباشرة بعد الدعوة المصرية لخلق آلية موحدة تحمي المصالح المشتركة للدول الإسلامية… وغالبًا في تفاصيل تم الاتفاق عليها ولسه منعرفهاش..
الخبر ده معناه ان في تغير بدأ يحصل فعلًا… القوة الإسلامية المشتركة بدأت تتشكل بالفعل، بس غالبًا هتحصل بطريقة تدريجية على شكل اتفاقيات ثنائية ما بين الدول وبعضها، وغالبًا و(نتمنى) إن ده يؤدي لتكتلات وتحالفات إقليمية جديدة تنضم ليها مصر وتركيا وإيران، عشان يشكلوا مع بعض محور ردع شامل ضد الغطرسة الإسرائيلية، وخططها للتوسع في المنطقة وضم أجزاء من السعودية ومصر وسوريا ولبنان والأردن وكامل أراضي فلسطين التاريخية…
طبعًا الكلام ده لا يشمل قطر اللي راحت ووسعت اتفاقياتها الدفاعية مع أمريكا تاني يوم بعد القمة عادي، ولا كإنها اتضربت او حصلها أي حاجة… ربنا يهديهم ويوحدنا على قلب رجل واحد…
